દિલ તો બચ્ચા હૈ જી!!!!!!

મિત્રો, આજે આપ સૌને એક એવા  ગ્રુપની વાત કરવા જઈ રહ્યો છું કે જે બાળમંદિરથી લઈને ધોરણ 12 સુધી એકસાથે એક જ શાળામાં ભણ્યાં, આખડ્યાં, બાખડ્યાં અને છૂટાં પડીને ત્રીસ વર્ષે પાછાં ભેગા થયાં. ત્રીસ ત્રીસ વર્ષના વ્હાણાં વાઈ ગયાં બાદ ભેગાં થયેલાં આ ગ્રુપને આપણે ઓળખીશું બાળમિત્રોનાં નામે.

કોણ કહે છે કે દુનિયા બહુ મોટી છે. જ્યાં સુધી કમ્પ્યુટર કે ઈન્ટરનેટની શોધ નહોતી થઈ ત્યાં સુધી દુનિયા મોટી લાગતી હતી. પણ, જેવી આ બધા ઉપકરણો આવ્યાં કે દુનિયા ખોબાં જેવડી થઈ ગઈ અને ફેસબૂક અને વ્હોટ્સ એપ જેવા સોશિયલ મિડિયાએ તો દુનિયામાં દૂર સુદૂર વસેલાં કે વર્ષો પહેલાં અન્ય કોઈ ઠેકાણે જઈને વસેલાં લોકોને પણ શોધી કાઢયાં છે. અને માત્ર એક ચાંપ દબાવતાં જ આ તમામ એકજૂથ થઈ જાય છે. આવાં જ કેટલાંક લોકો આપણાં મુખ્ય પાત્રો છે, જે ત્રણ દાયકા પહેલાં છૂટાં પડ્યાં અને હવે ભેગા થયાં છે.

તો પ્રસ્તુત છે, અનોખાં મિત્રોની વાત... જે તમામ બાળમિત્રો અને તેમનાં ટાબરોને નામ.

મે મહિનાના અંતિમ સપ્તાહમાં મારા વ્હોટ્સ એપ પર એક સંદેશો આવ્યો. એ સંદેશો હતો સ્કૂલ ટાઈમના મારા એક ખાસ મિત્રનો.. તેણે મને જાણ કરી કે આપણી શાળામાં સાથે ભણેલા તમામ મિત્રોનો એક સમૂહ ભેગો થયો છે અને બાળમિત્રો તરીકે વ્હોટ્સ એપ પર એક ગ્રુપ બનાવ્યું છે. મેં તારો નંબર ગ્રુપના એડમિનને મોકલી આપ્યો છે, તને ગ્રુપમાં એડ કરે તો વાંધો નથીને... ત્યારે મેં કહ્યું કે કોઈ જ વાંધો નથી. અને પછી જોવા લાગ્યો રાહ... બાળમિત્રોની.. જૂન મહિનાના પ્રથમ સપ્તાહમાં એકદમ જ મારા વ્હોટ્સ એપ પર બાળમિત્રો કરીને જે ગ્રુપ તેમાં મને જોડ્યાનો સંદેશો આવ્યો.. અને બસ, પછી શરૂ થઈ ત્રીસ વર્ષ પહેલાની યાદોની મોસમ...

આ ગ્રુપ એ એક એવું ગ્રુપ છે કે જે વર્ષ 1986ની આસપાસ નારણપુરાની એક નામાંકિત શાળાના ધોરણ 12ના બોર્ડના પરિણામ બાદ પોતપોતાની કારકિર્દી બનાવવા તરફ કદમ માંડીને દૂર સુદૂર ચાલ્યા ગયેલાં લોકો. બાળમિત્રો.. નામ જ કેટલું સરસ અને મજ્જાનું છે. નામ માત્રથી જ આટલી ઉંમરે પણ બાળક બનવાનું પાછું મળ્યું. આ ગ્રુપમાં ત્રીસ વર્ષ પહેલાં છૂટાં પડેલા મિત્રો સાથે પરિવારના ફોટા અને તેમની ઓળખ તથા પોતાની વર્તમાન કામગીરીની ઓળખ દરેકે દરેક બાળમિત્રએ આપી. અને યાદ આવી ગયું શાળાના એ દિવસો... પછી તો બીજું શું જોઈએ.... તમામ બાળમિત્રો લાગણીનાં ઘોડાપૂરમાં તણાવા લાગ્યાં કે ગણતરીની મિનિટોમાં તો વ્હોટ્સ એપ પર ઢગલાબંધ સંદેશાઓ પડી ગયાં હોય..

જે દિવસે એકબીજાના પરિચય થયા એ દિવસે પ્રસિદ્ધ ગઝલગાયક સ્વ. જગજિત સિંઘની આ ગઝલ તરત જ બુઢ્ઢા દિમાગમાં આવી...

ગઝલના શબ્દો  છે...

ये दौलत भी ले लो,

ये शौहरत भी ले लो,

भले छीन लो मुझसे मेरी जवानी,

मगर मुझको लौटा दो वो बचपन का सावन,

वो कागझ की कस्ती वो बारिश का पानी, वो कागझ की कस्ती वो बारिश का पानी।

આ ગઝલ વ્હોટ્સ એપમાં બાળમિત્રો સાથે શેર કરી અને તમામ બાળમિત્રો કિલ્લોલ કરવા લાગ્યાં અને ગણગણવા લાગ્યાં. આ ગ્રુપમાં અમદાવાદમાં રહીને નારણપુરાની નામાંકિત શાળામાં ભણીને પોતપોતાના ક્ષેત્રમાં આગળ વધેલા આ બાળમિત્રોમાં ઘણાં અમદાવાદમાં જ ઠરીઠામ થયેલાં છે, તો ઘણાં અમેરિકા, ઓસ્ટ્રેલિયા અને સિંગાપોર સ્થાયી થયાં છે.

ત્રીસ વર્ષ પહેલાનાં આ બાળમિત્રોમાં ઘણાં ફેરફારો જોવા મળ્યાં. કેમ કે ત્રીસ વર્ષ પહેલાં તેઓ જે ઉંમરે હતા તે ઉંમરે આજે તેમનાં ટાબરો છે. પરિવારની ઓળખ સાથે મેં પણ મારા પરિવારને મારા આ બાળમિત્રોના ફોટા બતાવીને તેમને ઓળખાણ આપી કે નારણપુરામાં શાળામાં છેક બાળમંદિરથી લઈને ધોરણ 12 સુધી મોટાભાગના આ બાળમિત્રો અમે સાથે ભણ્યાં હતાં. પરિવાર પણ એકદમ આનંદિત થઈ ગયો.

દરમિયાનમાં બાળમિત્રો રોજે રોજ સવાર પડે એટલે જય શ્રીકૃષ્ણ, જય સ્વામિનારાયણ અને ગુડમોર્નિંગ કે ગુડ ઇવનિંગ કરતા અને વાતોનાં વડાં  કરતાં. ત્રીસ વર્ષ બાદ મળેલાં બાળમિત્રો ગણતરીના કલાકોમાં જ એકબીજા સાથે અમે જ્યારે શાળામાં હતાં ત્યારે જે રીતે મળતાં વાતો કરતાં કે રમતાં એમ રમવા લાગ્યાં વ્હોટ્સ એપ પર...  કોઈ શાળાના મેદાનમાં નહિ.

રોજેરોજની વાત્યું અને ગામ ગપાટાં દરમિયાન પરિવાર સાથે એક મિલન સમારંભ (ગેટ ટૂ ગેધર) રાખવાની દરખાસ્ત એક બાળમિત્રએ મૂકી અને સહર્ષ અન્ય તમામ બાળમિત્રોએ તેને ઉમળકાભેર સ્વીકારી લીધી. હવે મળવાનું નક્કી થયું તો સ્થળ પણ પસંદ તો કરવું જ પડે ને. એટલે તમામે આ ઉંમરે પણ શહેરની નામાંકિત અને નામચીન હોટેલ તેમ જ બગીચા રેસ્તોરાંની પસંદગી અને તેના ભાવ વ્હોટ્સ એપ પર મૂકવા માંડ્યા. સ્થળ એવું પસંદ કરવું હતું કે અમદાવાદના અલગ અલગ ખૂણે વસતા તમામ બાળમિત્રો આવી શકે. અને અંતે 15 દિવસની મગજમારીના અંતે શહેરની એક નામાંકિત રેસ્તોરાંની પસંદગી કરવામાં આવી. જૂન મહિનાના અંતિમ શનિવારે સાંજે 6.30નો સમય નક્કી કરાયો.

જેમ જેમ એ દિવસ નજીક આવતો ગયો તેમ તેમ દરેક બાળમિત્રો ત્રીસ વર્ષ પહેલાં  વિખૂટાં પડેલા  પોતાના મિત્રોને મળવાં તલપાપડ થવા લાગ્યા અને અંતે એ દિવસ આવી ગયો. એ દિવસે વિદેશમાં અને અન્ય રાજ્યોમાં વસતાં અમારાં કેટલાંક બાળમિત્રોએ એક સરપ્રાઈઝ આપી.  અમે જે રેસ્તોરાં નક્કી  કરી હતી,  ત્યાં અમે પહોંચીએ એ પહેલાં એક સ્વાદિષ્ટ કેક પહોંચી ગઈ. અને જેમ જેમ સમય થયો તેમ તેમ  તમામ બાળમિત્રો રેસ્તોરાં પર પોતપોતાના પરિવાર સાથે આવી ગયા. અને પછી શરૂ થઈ રૂબરૂ ઓળખાણ. પરિજનો પણ આ બાળમિત્રોને મળીને ભાવ વિભોર બની ગયાં. એ દિવસે મોટાં ભાગના બાળમિત્રોની આંખમાં ઝળઝળિયાં જોયાં અને ખ્યાલ આવ્યો કે ખરેખર મિત્રતા શું છે.

પછી શરૂ થયો મેળાવડો. મસ્તી કરતાં કરતાં પરિજનો સાથે મોટાં હોલમાં પોતે શું કરે છે અને પરિવારજનોનો પરિચય તેમ જ પોતાના ટાબરો પણ શું ભણે છે તેની માહિતીની આપ લે થઈ. કેક કટિંગ કર્યું અને પછી શરૂ થયું ભોજન. ભોજન કરતાં કરતાં ફોટાં પણ પાડ્યાં અને મસ્તી પણ કરી.

પણ ખરી મસ્તી તો ભોજન સમારંભ પૂર્ણ કર્યાં બાદ આ બાળમિત્રોએ કરી. રેસ્તોરાંમાંથી નીચે આવ્યા બાદ રાત્રે લગભગ સાડા દસ વાગ્યા સુધી બેસીને ફોટો સેશન  અને શાળાના એ દિવસોને યાદ કરીને વાગોળ્યાં. આ સમયે ગુજરાત બહાર અન્ય  રાજ્યોમાં વસતાં અને વિદેશમાં વસતાં બાળમિત્રો પણ આ મેળાવડાંના ફોટા માટે વ્હોટ્સ એપ પર સતત સંદેશાનો મારો ચલાવ્યા જ કરતાં હતાં.

આટલું ઓછું હોય એમ આ બાળમિત્રોના ટાબરિયાંઓ પણ જાણે વર્ષોથી એકબીજાંને ઓળખતાં હોય એ રીતે પોતાનું જૂથ બનાવીને રમ્મતો રમીને ગમ્મત કરવા લાગ્યાં. આ ટાબરોની વાત આટલેથી નથી અટકતી તેમણે પણ એકબીજાના મોબાઈલ નંબરની આપ-લે કરીને બીજા દિવસે ચિલ્લર પાર્ટી નામનું ગ્રુપ વ્હોટ્સ એપ પર બનાવી દીધું અને બાળમિત્રોની જેમ વાત્યુંનાં વડાં કરવાનું શરૂ કરી દીધું.

આ મેળાવડાં પછી તરત જ પાછા આ બાળમિત્રો બીજાં મેળાવડાં માટે નક્કી કરવા લાગ્યાં. રોજે રોજ નીતનવા જોક્સ, સુવાક્યો અને માથાંફોડ સવાલો અને તેના વિચિત્ર જવાબોનો દૌર અને પ્રવાહ સતત ચાલુ જ છે અને ચાલુ જ રહેશે.

ખરેખર બાળપણ એક એવી ચીજ છે કે તે ગમે તે ઉંમરે પણ યાદ આવે તો તેમાં ડૂબકી મારવાનું મન થાય જ.

So, Keep It Up “BalMitro”….

-અભિજિત

03-07-2015

વિશ્વ યોગ દિનની ઉજવણીઃ નિષ્ફળતા ઢાંકવાનો કારસો કે ખરેખર જાળવવો છે યોગનો વારસો

આવતીકાલે સમગ્ર વિશ્વમાં આંતરરાષ્ટ્રીય યોગ દિવસની ઉજવણી કરવામાં આવશે. યુનોએ ભારતીય લોકોની લાગણી અને માગણીને માન આપીને દર વર્ષની 21મી જૂને આંતરરાષ્ટ્રીય યોગ દિન તરીકે ઉજવવાની જાહેરાત કરી છે. આ જાહેરાત થતાં જ કેટલાંક લોકોએ આ માટેની પ્રસિદ્ધિ લેવાની તક ઉપાડી લીધી અને પોતાના ટ્વીટર તેમ જ ચેલાઓ દ્વારા જાહેરાત કરાવી દીધી કે દરેક સરકારો દ્વારા અને ખાસ કરીને કેન્દ્ર સરકાર દ્વારા જાહેરમાં યોગ કરવા લોકોએ ભેગા થઈને આ દિવસની ભવ્ય ઉજવણી કરવી. આ વાતને જી સાહેબ જી સાહેબ કરનારા લોકોએ ઉપાડી લીધી અને સમગ્ર દેશમાં આંતરરાષ્ટ્રીય યોગ દિનની ઉજવણી કરવા માટે કરોડોનો ધૂમાડો કરવાની શરૂઆત કરી દીધી. આ પ્રકારે આંતરરાષ્ટ્રીય યોગ દિનના દિને સામૂહિક યોગના કાર્યક્રમો યોજાવીને કેન્દ્ર સરકારે હાલમાં કેન્દ્ર સરકાર અને ખાસ કરીને ભાજપના નેતાઓ વિરોધ દેશભરમાં ચાલી રહેલા વિવાદો પર પડદો પાડવા અને લોકોનું ધ્યાન બીજે ડાયવર્ટ કરવાનો પ્રયાસ ચોક્કસ કામ કરી ગયો.

દેશમાં હાલમાં કેન્દ્રીય વિદેશ મંત્રી સુષ્મા સ્વરાજ અને રાજસ્થાનના મુખ્યપ્રધાન વસુંધરા રાજે સિંધિયાની ભૂતપૂર્વ આઈપીએલ ચેરમેન લલિત મોદીને મદદ કરવાનો આરોપ લાગ્યો છે અને તેની આગ સમગ્ર દેશમાં ફેલાઈ છે. આ ઉપરાંત મોટા ઉપાડે સત્તા પર આવવા માટે વડાપ્રધાન નરેન્દ્ર મોદીએ લોકસભાની ચૂંટણી દરમિયાન કહી તો દીધું હતું કે અચ્છે દિન આયેંગે. પણ અચ્છે દિન તો આવ્યા જ નહિ અને ઉલ્ટાનું મોંઘવારી વધીને આસમાને પહોંચવા લાગી. આ ઉપરાંત સ્વીસ બેન્કોમાં ભારતીયોના કાળા નાણાં લાવવાના વચનને પણ ભૂલાવી દેવા માટે આંતરરાષ્ટ્રીય યોગ દિનની સામૂહિક ઉજવણી કરાવવાનો પેંતરો રચી દીધો.

આ દિવસની ઉજવણી શા માટે યોગ તો લોકો રોજ કરે છે. આ કોઈ નવી વાત નથી. પણ હંમેશા પ્રસિદ્ધિ મેળવવા માટે તલપાપડ રહેતા વડાપ્રધાન મોદીજીએ આ દિવસને પણ પોતાના નામે કરાવવા માટે ઠેર ઠેર દરેક રાજ્યોમાં અને રાજધાની દિલ્હીમાં રાજપથ પર સામૂહિક યોગનું આયોજન કરવાનું ફરમાન કરી દીધું. અને રાજ્ય સરકારો પણ (ખાસ કરીને ભાજપ શાસિત રાજ્યો)એ તો આંખે પાટા જ બાંધી દેવાના અને ભલેને પોતાના રાજ્યની પ્રજાને સવલતો વગર ભલેને સબડવું પડે પણ કરોડો રૂપિયા આ યોગ દિવસની ઉજવણી પાછળ ખર્ચ કરી દેવા તૈયારી કરી દીધી.

અમદાવાદમાં પણ ઠેર ઠેર આંતરરાષ્ટ્રીય યોગ દિનની ઉજવણી માટે મસમોટા પાટિયાં લગાવી દેવાયા છે, જેમાં વડાપ્રધાન નરેન્દ્ર મોદીને યોગમુદ્રામાં બેઠેલા દર્શાવી જાણે તેઓ મોટા યોગ ગુરૂ હોય એવું સાબિત કરવાનો પ્રયાસ ભાજપ અને રાજ્યની સરકાર દ્વારા થઈ રહ્યો હોય એવું લાગે છે. રાજ્યમાં ઘણાં એવા સારા યોગ ગુરૂ છે જેઓ આ માટે હકદાર છે. તેમને સાઈડ પર રાખીને પોતાની તસ્વીર સાથેના હોર્ડિંગ્સ મૂકાવવા પાછળનું કારણ શું હોઈ શકે? એ તો ખૂદ નરેન્દ્ર મોદી અને તેમના પક્ષના લોકો જ કહી શકે.

વિપક્ષોએ પણ જ્યારથી વડાપ્રધાન નરેન્દ્ર મોદીએ સામૂહિક યોગ કાર્યક્રમની જાહેરાત કરી છે, ત્યારથી તેમના કાન આમળવાનું શરૂ કરી દીધું છે. વિપક્ષોનો સૂર કહે છે કે, વડાપ્રધાન નરેન્દ્ર મોદીની સરકાર પોતાની નિષ્ફળતાઓને છૂપાવવા માટે આવી નૌટંકી કરી રહી છે. અગાઉ અનેક યોગ ગુરૂઓએ રાજ્યોમાં યોગ કરાવ્યા છે, પણ ક્યારેય આવી પ્રસિદ્ધિ કરવામાં આવી નથી જેટલી વડાપ્રધાન નરેન્દ્ર મોદીએ 21મી જૂનના રોજ વિશ્વ યોગ દિને સામૂહિક યોગનો કાર્યક્રમ યોજીને પ્રસિદ્ધિ મેળવીને ભારતીય પ્રજામાં પોતાની છબિને યોગપુરૂષ તરીકે ઊભી કરવાનો પ્રયાસ જે રીતે કરવામાં આવી રહ્યો છે. આ પ્રકારની પ્રચારની નીતિ જોતાં ભાજપના વરિષ્ઠ નેતા વડાપ્રધાન નરેન્દ્ર મોદીના રાજકીય ગુરૂ લાલકૃષ્ણ અડવાણીએ જે આગાહી કરી છે કે જે લોકો સત્તાનો દુરુપયોગ કરનારને મતદારો પાઠ ભણાવશે. તે આ સંદર્ભમાં તો નથી ને!!!!!!!

ટૂંકમાં કહીએ તો આંતરરાષ્ટ્રીય યોગ દિનની મહાઉજવણી એ કેન્દ્ર સરકારની નિષ્ફળતાઓ ઢાંકવાનો કારસો છે કે ખરેખર યોગનો વારસો છે તે સાબિત કરવું છે તે પ્રજાએ નક્કી કરવાનું છે.

- અભિજિત

20-06-2015

તબીબી શિક્ષણઃ ગતિશીલ ગુજરાતનું અગતિશીલ ભણતર

ગુજરાતભરમાં શાળા કોલજમાં પ્રવેશની કાર્યવાહી હાલમાં ચાલી રહી છે. તમામ ફેકલ્ટીમાં વિદ્યાર્થીઓની સંખ્યા પ્રમાણે બેઠકોની સંખ્યા છે. પણ, મેડિકલમાં વિદ્યાર્થીઓની કુલ સંખ્યા સામે માત્ર જૂજ બેઠકો હોવાના કારણે ઘણાં વિદ્યાર્થીઓને તેમના મનપસંદ એવા મેડિકલ અભ્યાસથી વંચિત રહેવું પડે છે. આવી પરિસ્થિતિ માટે જવાબદાર કોણ એવો સવાલ દરેકના મનમાં ઉઠે એ વાત સ્વાભાવિક છે. રાજ્ય સરકાર કાયમ ચિપિયા પછાડીને કહે છે કે દરેકને શિક્ષણ મળી રહે તે માટે કટિબદ્ધ છે. પણ, હકીકતમાં રાજ્ય સરકારને બાળકોના ભવિષ્યની કોઈ ચિંતા નથી, તેમને ચિંતા છે તો માત્ર તેમની સત્તાની અને પૂનઃ સત્તા પર આવવાની જ હોય છે.

મુખ્યમંત્રી આનંદીબહેન પટેલે તેમના કાર્યકાળના એક વર્ષ પૂરા કર્યા અને એક નવું સૂત્ર આપ્યું ગતિશિલ ગુજરાત... શું આ છે આપણું ગતિશિલ ગુજરાત? ના, આ છે આપણા ગતિશીલ ગુજરાતનું અગતિશીલ ભણતર....

ગુજરાત બોર્ડના આંકડા પ્રમાણે આ વર્ષે ઘણાં વિદ્યાર્થીઓએ ગુજકેટની (મેડિકલ અને પેરા મેડિકલ માટે લેવાતી કોમન એન્ટરન્સ ટેસ્ટ) આપી. તેમાંથી લગભગ 80 ટકા જેટલા વિદ્યાર્થીઓ ઉતીર્ણ થયાં. આટલી મોટી સંખ્યા સામે મેડિકલમાં માત્ર 3080 બેઠકો જ છે. આટલી મોટી સંખ્યાના વિદ્યાર્થીઓ સામે માત્ર આટલી બેઠક... યે બાત કુછ હજમ નહિ હુઈ....

રાજ્ય સરકાર એકબાજુ ગાઈ વગાડીને કહે છે કે રાજ્યના તમામ બાળકને ભણવાનો અધિકાર છે. તો શું આ રીતે તમામ બાળકોને ભણાવશે. રાજ્યમાં તબીબી ક્ષેત્રે ભણતર માટે સુવિધાઓના નામે મીંડું છે. કેમ કે, રાજ્યમાં સરકારી મેડિકલ કોલેજની સંખ્યા માત્ર છ છે, તો સામી બાજુએ સ્વનિર્ભર કોલેજની સંખ્યા 12 છે. આ કોલેજોમાં કુલ 2780 બેઠકો છે, જેમાંથી માત્ર 1000 બેઠકો જ સરકારી કોલેજમાં છે જ્યારે 1780 બેઠકો સ્વનિર્ભર કોલેજોમાં છે. આવા સંજોગોમાં મેડિકલ ક્ષેત્રે પોતાની કારકીર્દી ઘડવા માંગતા ગરીબ-મધ્યમ વર્ગના બાળકો ક્યાં જાય? રાજ્ય સરકારે શિક્ષણની ગુણવત્તા સુધારવાના નામે સ્વનિર્ભર શાળા કોલેજને મંજૂરી આપીને ગરીબ મધ્યમ વર્ગના લોકોની ખો કાઢી નાખી છે. કેમ કે, સ્વનિર્ભર શાળા કોલેજના સત્તાધીશો કમાણીના આશયથી ફીનું ધોરણ એટલું ઊંચું રાખે છે કે, ગરીબ મધ્યમ વર્ગના લોકોને તે પરવડે તેમ ન હોવાથી આ વર્ગના બાળકો અન્ય ક્ષેત્રમાં ન જવા માંગતા હોવા છતાં પણ નાછૂટકે જાય છે. અને જિંદગીની નાવને આગળ ધપાવવા પ્રયાસ કરે છે, પણ તેમાં તે સફળ નથી થતાં. આ માટે જવાબદાર અન્ય કોઈ નહિ પણ માત્રને માત્ર રાજ્ય સરકાર જ છે. શું રાજ્ય સરકાર આવી રીતે સર્વ શિક્ષા અભિયાન ચલાવવા માંગે છે?

ગુજરાતના લાખો બાળકોના ભાવિ અત્યારે અદ્ધરતાલ છે, તો તે માત્રને માત્ર મેડિકલની બેઠકોને કારણે કેમ કે તેમણે નક્કી કરેલી કારકિર્દી થશે કે નહિ તેની દ્વિધા તેમને અને તેમના માતા-પિતાને જરૂર સતાવી રહી હશે. પણ, કોઈ ચિંતાની જરૂર નથી કેમ કે મોદીજી કહી ગયા છે ને કે “અચ્છે દિન આયેંગે”. હવે તે કોના માટે અને ક્યારે એતો મોદીજી અને તેમના પક્ષના નેતાઓ જ જાણે......

-અભિજિત

11-06-2015

ધરતીના સ્વર્ગને લાગી કોની નજર....

(ગુલમર્ગ)   

કિતની ખૂબસૂરત યે તસ્વીર હૈ,

મૌસમ બેમિસાલ, બેનઝીર હૈ,

યે કશ્મીર હૈ, યે કશ્મીર હૈ....

ઉક્ત ગીતોની પંક્તિઓ સદીના મહાનાયક અમિતાભ બચ્ચન અભિનિત ફિલ્મ "બેમિસાલ"ની છે. ખરેખર વર્ષો પહેલા આવેલી આ ફિલ્મનું ગીત આજે પણ સાંભળું કે જોવું કશ્મીરની એ હસીન વાદીઓ યાદ આવી જાય, જ્યાં ગયા વર્ષે પરિવાર સાથે જવાનું થયું.. આ એ જ કશ્મીરને સંબોધીને ગીત લખવામાં આવ્યું છે જેને લોકો ધરતીનું સ્વર્ગ કહે છે. અને સાચે જ ધરતી પર સ્વર્ગ ક્યાંય છે તો તે કશ્મીરમાં જ છે. દેશ આઝાદ થયો ત્યારથી અહીંના કુદરતી સૌન્દર્યને માણવાનું હરકોઈ પોતાની જિંદગીમાં ઈચ્છે અને ઘણાની એ ઈચ્છા ફળે અને ઘણાની મનમાંને મનમાં જ રહી જાય. કશ્મીરના સૌન્દર્યની વાત જ નિરાળી છે. અને ખરેખર તે ધરતી પરનું સ્વર્ગ જ છે. દેશ આઝાદ થયો ત્યારથી પાકિસ્તાનની નાપાક નજર આ આપણા સ્વર્ગ પર લાગી ગઈ છે. છેલ્લા કેટલાય વખતથી આતંકવાદે કશ્મીર પર ભરડો લીધો હતો. અને તેને કારણે અહીં આવતા પ્રવાસીઓની સંખ્યા દિનપ્રતિદિન ઘટવા લાગી હતી. પણ ધીમે ધીમે આ સમસ્યામાંથી કશ્મીર મુક્ત થયું, જોકે સંપૂર્ણપણે હજુ આતંક્વાદમાંથી કશ્મીરને મુક્તિ નથી મળી. પણ આશા છે કે કશ્મીરમાંથી આતંકવાદનો ખાત્મો બહુ ઝડપથી થશે. હાલમાં થોડે અંશે આતંકવાદના ભરડામાંથી મુક્ત થયેલા કશ્મીરમાં ફરી એકવાર પ્રવાસીઓની લાઈન લાગવા માંડી. અને એનું સૌન્દર્ય સોળે  કળાએ ખીલી ઉઠ્યું હતું... કુદરતી સૌન્દર્યથી ભરપૂર એવા કશ્મીરમાં ફરવા ગયા હોઈએ અને બરફવર્ષા ના જોઈએ તો કશ્મીરનો ફેરો અસફળ ગણાય... કેમકે, આ જ બરફવર્ષા જોવાની અને માણવાની મઝા જ કંઇક ઓર છે.

ગઈ દિવાળીમાં કશ્મીર ગયા તો સ્વપ્ને પણ ખ્યાલ નહોતો કે બરફવર્ષા થશે અને માનીશું.. કેમકે, સામાન્ય રીતે ડિસેમ્બરમાં બરફવર્ષા થતી હોય છે, એવું અમે પહેલગામમાં જયારે આરુ વેલીથી ચંદનવાડી જઈ રહ્યા હતા ત્યારે અમારી કારના ડ્રાઈવર નાસીરભાઈએ કહ્યું. આરુ વેલીથી ચંદનવાડીના માર્ગે જયારે હિમવર્ષા શરૂ થઇ અને તે માત્ર ફિલ્મોમાં જોઇને સંતોષ માનતા હતા એ દ્રશ્યો નજરોનજર નિહાળીને એવું લાગ્યું કે આ સપનું કે કોઈ ફિલ્મ તો નથી જોઈ રહ્યા ને....!!!!! રસ્તાની બંને બાજુ પર આવેલ વૃક્ષો અને જે રસ્તા પરથી કાર જઈ રહી હતી તે રસ્તા પર બરફની સફેદ ચાદર છવાઈ ગઈ, અને તે જોઇને ખરેખર મઝા પડી ગઈ. આવા સમયે એમ લાગ્યું કે, ખરેખર જીવન સાર્થક થઇ ગયું.

(ચંદનવાડી માર્ગ)

આવો માહોલ તે સમયે જોઇને ખરેખર માન્યું કે, હિમવર્ષાને કારણે જ આ કશ્મીરની સુંદરતા માણવાનો અને એનો લુફ્ત ઉઠાવવાનો મસ્ત મોકો મળી ગયો.
જોકે, 2 સપ્ટેમ્બરના રોજ આ સુંદરતાને જાણે કોઈની નજર લાગી ગઈ હોય એમ કહો અથવા તો કુદરત રૂઠી હોવાના કારણે આખી કશ્મીરની વાદીમાં મેઘરાજાના પ્રકોપે ખૂબસૂરત કશ્મીરને બદસૂરત બનાવી દીધું... આખી કશ્મીર ઘાટીમાં આવેલા વિનાશક પૂરને કારણે આખું કશ્મીર જાને થંભી ગયું હોય એમ લાગે છે. કશ્મીર પ્રવાસ વખતે જ્યાં પણ ફર્યા ત્યાં જે લોકો આટલી હિમવર્ષામાં પણ હસતા મોંઢે અમારી સાથે રહીને વિસ્તાર કે જગ્યાની જાણકારી આપી હોય એવા એ માસૂમ અને નિર્દોષ લોકો આજે કુદરતની થપાટ ખાધા બાદ કેવી સ્થિતિમાં હશે તે વિચારમાત્રથી ધ્રુજારી છૂટી જાય છે. કેમ, કે આ એ લોકો છે જેમને હિમવર્ષામાં ગાત્રો થીજાવી દે તેવી ઠંડીમાં થીજી ગયેલા શરીરમાં કેવી રીતે ગરમાવો પાછો લાવવો તે બતાવ્યું. બરફવર્ષામાં થીજી ગયેલા હાથને ફરી સામાન્ય સ્થિતિમાં લાવવા માટે કશ્મીરી પ્રજાની પ્યારી "કાંગરી" પર હાથ મુકવાનું શીખવાડ્યું.. એ લોકો સહી સલામત હોય એવી દુવા કરું છું.

 (દલ લેક)

સુંદરતાની મિસાલ સમા બેમિસાલ કશ્મીરમાં આજે આવકનો સ્રોત અટકી ગયો છે, ઠેર ઠેર પાણી અને પાણીની વચ્ચે કશ્મીરની પ્રજા સહાય માટે ફાંફા મારતી જોઇને કઠણ કાળજાનો માનવી પણ પોતાની આંખના આંસુ રોકી ના શકે એવી હાલત થઇ છે. અને આમ મેઘરાજાના પ્રકોપ સામે સોળે કળાએ ખીલેલું કશ્મીર કરમાઈ ગયું...

અભિજિત
12/09/2014

બ્લોગની દુનિયામાં ફરી પગરણ....

દોસ્તોને નમસકાર,

ઘણાં લાંબા સમય પછી  ફરી એકવાર બ્લોગ લખવાનું શરૂ કરી રહ્યો  છું. કારણ એક જ  હતું કે આટલા સમય દરમિયાન પત્રકારત્વ છોડીને જનસંપર્ક ક્ષેત્રમાં જોડાયો. કંઇક નવું કરવાનું વિચાર્યું અને એવું પણ વિચાર્યું કે પત્રકારત્વમાં પરિવાર સાથે સમય પસાર  નહિ કરી શકાય, અને જનસંપર્કમાં જઈશું તો પરિવારને સમય ફાળવી શકીશું અને બ્લોગ પણ લખી શકીશું.. પણ,  ના જનસંપર્ક  ક્ષેત્રમાં તો તેના કરતા પણ વધારે સમય જતો હતો. સવારના નવથી સાંજના છ વાગ્યા સુધીના નોકરીના સમયમાં થાકીને ઠૂસ થઇ જવાતું હતું.. અને પછી ઘરે પહોંચ્યા બાદ કંટાળો આવતો... એટલે બ્લોગ લખવાનો સમય જ ના કાઢી શકાયો. પણ  હવે ગમે  તેમ કરીને પણ સમય કાઢીને ફરી બ્લોગ લખવાનું શરૂ કરવાનો વિચાર મારી પત્ની નિમિષા અને બે દીકરીઓ અનાહિતા અને આર્યાએ આપ્યો.. અને શરૂ કર્યું ફરી બ્લોગ લખવાનું..

છેલ્લે 2010માં બ્લોગ લખ્યો પછી આજે લખવા બેઠો છું, ચાર વર્ષના લાંબા ગાળા બાદ શું લખવું શું ના લખવું તે સુઝતું નથી. પણ મને વિશ્વાસ છે કે હું આપ સૌની અપેક્ષાઓ પૂરી કરું એવો બ્લોગ જરૂરથી લખીશ.. મારા લખાણને ઝેલવા તૈયાર થઇ જાઓ. ટૂંક સમયમાં આપને માટે સરસ વિષય પર બ્લોગ  લઈને આવીશ.

અભિજિત 

06-09-2014